विश्वचौतारीमा यहाँलाई हार्दिक स्वागत छ।

1/20/2018

गजल ‘को होला?’

लुकी लुकी त्यो झ्यालबाट हेर्ने को होला?
मनको आँगनमा प्रेमको फूल छर्ने को होला?

शरीर थर्थरी काप्ने गर्छ विहानीको सिरेटोमा
अन्जानलाई न्यानो अँगालोमा बेर्ने को होला?

हिडीरहेछु वर्षौ देखि उही एक्लो यात्रामा 
मलाई देखी लजाउदै बाटो फेर्ने को होला?

लेख्ने आँट गरेन कसैले हृदयको भित्तामा
मुटुको कुनामा आफ्नो नाम केर्ने को होला?

यो जीवनमा सुन्दर रंगहरू भर्ने को होला?
लुकी लुकी त्यो झ्यालबाट हेर्ने को होला?

-विश्वबन्धु कार्की, हाल:अमेरिका 

1/15/2018

गजल ‘थाहै भएन’

जिन्दगी कति चाडो ढल्किएछ थाहै भएन
मनमा प्रेमको आगो सल्किएछ थाहै भएन।

तिरमिर तिरमिर देख्दैछु त्यो परको क्षितिज 
आँखामा तिम्रो तस्विर टल्किएछ थाहै भएन।

बगैंचामा गुनगुन बढ्दै गएकोछ हिजोआज
ती फूलहरूमा भमरा पल्किएछ थाहै भएन।

बिर्सन धेरै कोशिशहरू गरि नै रहे रातभर
फेरि पुराना यादहरू झुल्किएछ थाहै भएन।

सम्झनाका छाल छचल्किएछ थाहै भएन
जिन्दगी कति चाडो ढल्किएछ थाहै भएन।

-विश्वबन्धु कार्की, हाल:अमेरिका 

1/14/2018

गजल ‘गन्तव्य’

सधै खट्किरहन्छ मनमा एउटै कुरा
गन्तव्य टाढा कहिले होला पुरा?

आजकल मुटु दुखेको दुख्यै मेरो
एक हातले गुलाब दियौ अर्कोले छुरा।

झुपडीको छानो नटालेको वर्षौ भाछ 
कहाँ पाउँ हीराका हार सुनका चुरा?

दु:खको पहाड झनझन अग्लो बन्दैछ 
आफ्नै खुशीहरू भने बन्दै गए भुरा।

उमेरसँगै हातगोडाहरू हुदै गए लुरा
गन्तव्य टाढा कहिले होला पुरा?
-विश्वबन्धु कार्की, हाल:अमेरिका