विश्वचौतारीमा यहाँलाई हार्दिक स्वागत छ।

6/24/2016

गजल

 मनमा काउकुति लगाउनेको के दोष?
मायाको वासना जगाउनेको के दोष?

उडी रह्ये मन फुरूङ त्यो आकाशमा
दिउसै जूनतारा मगाउनेको के दोष?

पर्खि बसें तिम्रो बाटो हेर्दै चौतारीमा
तिमीलाई सुटुक्क भगाउनेको के दोष?

यहाँ बेचिदोरैछ प्लाष्टिकको गुलाब
पैसासँग यो प्रेम ठगाउनेको के दोष?
                  ***

6/23/2016

गजल

मन्दिरको भेटी चोर्नेहरू हे राम राम
देशको ढुकुटी फोर्नेहरू हे राम राम।

धाराबाट थोप्पो झर्दैन पानी शहरमा
मेलम्चीको नक्सा कोर्नेहरू हे राम राम।

भुकम्प पीडितहरू अझै पाल मुनि छन्
दानको डलरले घर जोर्नेहरू हे राम राम।

बालुवामा सुन खोज्न उड्यो ऊ खाडीतिर
सिंहदरबारमा पैसा सोर्नेहरू हे राम राम।
                      ***

गजल

रोम रोममा नसा चढेको बेला
मुटुको चाल अलि बढेको बेला।

नसुनाउ तिम्रा प्रेम कहानीहरू
मनमा व्यथा गढेको बेला।

कसरी भागौं यो दुनिया देखि
पृथ्वी नै सारा अढेको बेला।

मुनामदनलाई कतै बिर्सियौ कि?
रोमियो र जुलियट पढेको बेला।
               ***

6/22/2016

गजल

ओईलाइ फूल झरेर जान्छ
आकाशको जून सरेर जान्छ।

अजम्बरी छ प्रीत मायालु
मुटुमा जीवन भरेर जान्छ।

जब भेट्छु तिमीलाई बाटोमा
मायाको ईन्द्रेणी परेर जान्छ।

दु:खको दलदलमा भासिएछु
नडराउ यो दशा टरेर जान्छ।

कति कुद्ने सधै पैसा कै लागि?
शरीर त एकदिन मरेर जान्छ।
                ***

6/21/2016

गजल

खोज्छ भोक जिन्दगी भातको सितामा
हेर्छ टुहुरो एकटक जल्दो घाटको चितामा।

जिसस् इज ग्रेट भन्दैथे पुजारी बाबा
कसम खाएर उनै फेरि छुन्छन् गीतामा।

अर्ति छाडी  हिड्यो छोरो अर्कै बाटो
आज खोट देख्दैछ ऊ आफ्नै पितामा।

भेटी एक चढाई भक्त टिप्छ पाँचका नोट
देखी हाँस्छन देवता मन्दिरका भित्तामा।
                        ***