गजल ‘थाहै भएन’

जिन्दगी कति चाडो ढल्किएछ थाहै भएन

मनमा प्रेमको आगो सल्किएछ थाहै भएन।

तिरमिर तिरमिर देख्दैछु त्यो परको क्षितिज 

आँखामा तिम्रो तस्विर टल्किएछ थाहै भएन।

बगैंचामा गुनगुन बढ्दै गएकोछ हिजोआज

ती फूलहरूमा भमरा पल्किएछ थाहै भएन।

बिर्सन धेरै कोशिशहरू गरि नै रहे रातभर

फेरि पुराना यादहरू झुल्किएछ थाहै भएन।

सम्झनाका छाल छचल्किएछ थाहै भएन

जिन्दगी कति चाडो ढल्किएछ थाहै भएन।

-विश्वबन्धु कार्की, हाल:अमेरिका