विश्वचौतारीमा यहाँलाई हार्दिक स्वागत छ। Welcome to bishwachautari.com. Here you will get all information in just a click. Don't forget to subscribe for new post and updates.

December 02, 2018

कविता 'पुरस्कार पसल'

मेरो घर छेउ 
अहिले नयाँ पसल खुलेको ,
'पुरस्कार पसल'
पसल अगाडीको बोर्डमा 
ठूलो अक्षरले लेखिएकोछ
हे महोदय,
कस्तो पुरस्कार खोज्नु भएको?
रोजी रोजीछानी छानी लानुहोस्
अब पुरस्कार नपाएर मर्ने दिन गए।
मैले साहुजीलाई सोधे
कस्तो पसल खोल्नु भएको?
यस्तो नि काही पसल हुन्छ?
साहुजीले मुस्कुराउदै सोध्नु भो
कहिले पुरस्कार पाउनु भएकोछ?
छैन
केही लेख्नु भएको ?
अलिअलि
कति भयो लेख्न थालेको?
१५-२० वर्ष
हो यो पसल 
तपाई जस्तैहरूको लागि हो
देख्नु भयो 
खुलेको दुई दिन मै 
सबै पुरस्कार बिक्री भैसकेका छन्,
अब केही मात्र बाँकी ,
त्यो पनि भरैसम्ममा बिक्री हुनेछ।
तपाईको पुरस्कार कस्ले किन्छ?’
त्यो माख्लाघरे कान्छो छैन
एकै दिनमा तीनवटा किनेर लग्यो
सबै राम्रा  महँगा पुरस्कार। 
उल्ले के कुरामा योगदान गरेको ?’
पुरस्कार पैसाले पाइन्छ
योगदान चाहिन्न
त्यतिकैमा एउटा ग्राहक आयो
पुरस्कार ?’
 कस्तो चाहिने हो?
ताम्रपत्र सहितको कि सामान्य?
किनेपछि राम्रै किन्ने हो
लु यो लिनुस् सबैभन्दा राम्रो
पैसो कति हो?’
कति दिन सक्नु हुन्छ?
उधारो दिनुहुन्छ?’
पुरस्कार नि उधारो?
पुरस्कार चाहिएको  पैसा छैन
आफ्नै मान्छे विश्वास गरे
लिएर जानुहोस्
पुरस्कारको वारेन्टी छैन?’
कतिको वारेन्टी लिनुहुन्छ?
 महिनाएक वर्षपाँच वर्ष?
चिन्ता गर्नु पर्दैन
हाम्रो पसलको पुरस्कार धेरै टिक्छ
घामपानीहुरीवतासअसिनाले यो बिग्रदैन
लु राखिदिनुहोस् झोलामा
खुशी हुदै ग्राहक लाग्छ आफ्नो बाटो
पसले नयाँ पुरस्कारको 
प्याकेट खोल्दैछन्।
 छाम्छु खल्तिमा 
 निकाल्छु गाता नभएको मेरो पुरानो किताब
मलाई देखेर किताब 
केहि भन्न खोज्दैछ
किताबलाई हेर्दै  मौन उभिएको छु 
साहुजी चिच्याउन थाले
पुरस्कारपुरस्कारपुरस्कार..
सस्तोभरपर्दोविशेष छुटसहित....’
पसल अगाडि अर्को ग्राहक उभियो
 सोच्दैछु
आजकल,पुरस्कार पसलको व्यापार चम्कदैछ।

-विश्वबन्धु कार्की, हाल:अमेरिका 

November 04, 2018

छुट्यो टीका



खाली मेरो निधार छुट्यो टीका
दिदीबैनीको प्यार छुट्यो टीका।

आउछु भन्दाभन्दै वर्षौ बितिगो
विदेशको घरवार छुट्यो टीका।

झिलीमिली होला त्यो गाउँशहर
अँध्यारो यो संसार छुट्यो टीका।

मखमली सयपत्री फुलेको पल
खल्लो भो तिहार छुट्यो टीका।

-विश्व कार्की,
हाल-भर्जिनिया, अमेरिका

October 24, 2018

दशैं आयो



दुवोमा लागेको शित सम्झें दशैं आयो
सुमधुर मालश्री गित सम्झें दशैं आयो।

हार्न जानेको छैन नेपाली मनले कतै
दुर्गा भवानीको जीत सम्झें दशैं आयो।

हुर्केको बचेरो पुग्यो सात समुन्द्र पारी
चराचुरूंगीको प्रीत सम्झें दशैं आयो।

देउरालीमा पिंग खेल्नेको भीड होला
सुन्दर नेपाली रित सम्झें दशैं आयो।

-विश्व कार्की,
हाल-भर्जिनिया, अमेरिका

July 15, 2018

फ्रान्सलाई दोश्रो पटक विश्वकप फुटबलको उपाधि


विश्वकप विजेता फ्रान्सेली टोली ट्रफीको साथमा 
विश्वकप फुटबलको एक्काइसौ संस्करण फ्रान्सले जित्न सफल भएको छ।  एम्बाप्पे,ग्रिञ्ज्म्यान र पोग्बाजस्ता खेलाडीले भरिएको फ्रान्सका अगाडी उत्कृस्ट खेल खेलेको क्रोएसियाको केहि लागेन। मोर्डिच र रेकेटिच जस्ता उदयमान खेलाडीले भरिएको क्रोएसिया फ्रान्स संग ४-२को गोल अन्तरले पराजित भएको हो।क्रोएसिया पहिलो पटक विश्वकपको फाईनलमा पुग्न सफल भएको थियो। फ्रान्सले दोश्रो पटक उपाधि जितिरहदा फ्रान्सका प्रशिक्षक डेस्च्याम्पले खेलाडी र प्रशिक्षक दुवैको रुपमा विश्वकप जित्ने तेश्रो व्यक्ति बन्दै ईतिहासमा नाम लेखाएका छन्।

विश्वकपको उत्कृस्ट खेलाडी क्रोएसिया लुका मोर्डिच ,उत्कृस्ट युवा खेलाडी फ्रान्सका एम्बाप्पे,उत्कृस्ट गोलकर्ता (सुनौलो जुत्ता) इंगलैंडका ह्यारी केन, उत्कृस्ट गोल रक्षक बेल्जियमका निकोलस कोर्टिजले जितेका छन् भने फेयर प्लेको उपाधि स्पेनले हात पारेको छ।  

विश्वकपका उत्कृस्ट खेलाडी घोषित मोर्डिच र युवा खेलाडी एम्बाप्पे
माण्जुकिकको पहिलो आत्मघाती गोलले फ्रान्सलाई १-०को अग्रता मिलेको थियो। क्रोएसियाका पेरिसिचले २८ औ मिनेटमा उत्कृस्ट गोल गर्दै खेललाई १-१ को बराबरी मा ल्याए। खेल को ३८ औ मिनेटमा फ्रान्सले पेनाल्टी पायो, उक्त अवसरलाइ फ्रान्सका ग्रिज्म्यानली खेर जान दिएनन्। ५९ औ मिनेट मा पोग्बा र ६५ औ मिनेटमा एम्बाप्पेले गोल गर्दै खेललाई ४-१ स्थितिमा पुर्याए, त्यस्को ४ मिनेट नबित्दै  क्रोएसियाका माण्जुकिकले गोल गर्दै खेललाई ४-२को स्थितिमा ल्याए, जुन नतिजा नै अन्तिम बन्न पुग्यो। क्रोएसियाले अन्तिम समयसम्म पनि गोल गर्ने प्रयासलाई जारी राख्यो तर उस्को केहि सिप लागेन।

विश्वकपको फाईनल हेर्न फ्रान्सका रास्ट्रपति एम्मानुएल म्यक्रॊन, क्रोएसियाकि रास्ट्रपति कोलिण्डा किटारोविच र रुसी रास्ट्रपति ब्लाधिमिर पुटिनपनि उपस्थित थिए। विश्वकप विजेता बनेको फ्रान्सका समर्थकहरु फ्रान्सको राजधानी पेरिस लगायत विश्वभर खुशी मनाइरहेका छन्। एक महिना सम्म चलेको विश्वकपको एक्काइसौ संस्करण सकिए लगत्तै २०२२मा कतारमा हुने २२ औ संकरणतिर फुटबल प्रेमी हरुको ध्यान मोडिएकोछ। 

July 10, 2018

भर्जिनियामा मारिएका रेशम बजगाईको परिवारलाई सहयोगको अपिल

पुर्ख्यौली घर गोरखा भई चितवन जिल्लाको भरतपुर निबाशी रेशम बजगाईलाई भर्जिनियाको हरन्डन स्थित फ़्रेंकलिन फ़ार्मको “SUNOCO “ ग्यास स्टेशनमा काम गरिरहेको अबस्थामा यही जुलाई ४ तारिक बिहान १:१५ बजे अज्ञात समुहले हत्या गरेका छन् । उनी अमेरिका आएको ९ महिना मात्र भएको र एउटी ५ बर्षकी छोरी र श्रीमतीका लागि यस दु:खद अवस्स्थामा केही सहयोग पुगोस भनेर एन आर एन भर्जिनिया च्याप्टरबाट यो गो फण्ड एकाउन्ट खोलिएको छ। कृपया यो मानबीय सहयोगमा सबैको साथ सहयोगको अपेक्षा गरेका छौ। 

सहयोग गर्न इच्छुक महानुभावहरुले कृपया उहाको तेह्रौं पुण्य तिथि  (July 17) अगावै सहयोग गरिदिनुहुन अनुरोध गर्दछौं। 

एन आर एन भर्जिनिया च्याप्टर

सहयोगको लागि तलको लिन्कमा जानु होला:
https://www.gofundme.com/helpfamily-of-resham-who-was-killed

May 06, 2018

गजल ‘झरी’

रातभर नै अविरल झरी परेको दिन 
जूनले आँगनीमा याद छरेको दिन।

पीडाले खुशीलाई बस्ने ठाउँ नि दिएन
खाली होला मनले बसाई सरेको दिन।

भाग्यमा साढे सातको दशा लागेकोछ
सुख पाईएला कि दशा टरेको दिन?

चल्छ सम्बन्धको रथ सधै विश्वासले 
यात्रा रोकिन्छ कुठाराघात गरेको दिन।

संसारलाई स्वार्थी बनाईरहेछ पैसाले
हारालुछ चल्छ घरमै अाफै मरेको दिन।

-विश्वबन्धु कार्की, हाल:भर्जिनिया,अमेरिका 

April 01, 2018

समयको कुरुप तस्बिर

समयको कुरुप तस्बिरअधिकांश मानिसको जीवन संघर्षमा नै रुमल्लिएर बित्ने गर्दछ । संघर्ष, त्यस्ता मानिसहरूका निम्ति जीवन जिउने सूत्र र कला पनि हो । र, त्यस्ता मानिसहरू संघर्षका अनेक तह र आयाम सँगालेर बाँचेका हुन्छन् र उनीहरूका हरेक पाइला–पाइलामा संघर्षका रेखाहरू चिन्हित हुन्छ ।
उपन्यासकार विश्वबन्धु कार्कीले आफ्नो प्रथम उपन्यास ‘मोना’मार्फत नेपाली समाजको अत्यन्तै कुरुप र असमान अनुहारलाई सार्वजनिक गर्ने ध्येय सँगालेको प्रतीत हुन्छ । उपन्यासमा उनले सामाजिक एवम् परिवेशगत विडम्बनालाई धेरै नै मिहिन र प्रभावकारी ढंगले चित्रित गरेका छन् । एउटा समाज र परिवारभित्रका व्यक्तिको जीवनकथा बुनिएको ‘मोना’मा विपन्न वर्गका कामकाजी महिलाको जीवन–संसार हामीसामु उपस्थित हुन्छ । उनले नेपाली समाजमा नारी वर्गले भोग्नुपरेका दु:ख, कष्ट, उत्पीडन, अपमान, अवसादजस्ता पक्षहरूलाई कलात्मक ढंगले पस्किएका छन् उपन्यासमा ।
उपन्यासकी मूलपात्र मोना एउटा गरिब परिवारमा जन्मिएकी दु:खका अनेक आयामहरूसित परिचित व्यक्ति हुन् । ग्रामीण भेगमा जन्मिएका उनले सानैदेखि पारिवारिक दायित्व बेहोर्न बाध्य हुनुपर्छ । ग्रामीण क्षेत्रका एउटा गरिब परिवारका नारीले के–कस्ता दु:खका शृंखलाहरू पार गर्नुपर्छ ? यो सर्वविदितै पक्ष हो । दु:खका पक्षहरू घना रहेकै अवस्थामा, किशोरकालीन दिनहरूमा टेक्दै गर्दा उनी र उनका समकालीन दलित युवा चन्द्रेबीच मायाका पोयोहरू बाटिन्छन् । उनीहरू एकैसाथ जिउने र मर्ने वाचासँगै सपनाका बान्कीहरू पनि बुन्छन् । तर, परिस्थिति भने उनीहरूले सोचेअनुरूप सरल र सुगम तरिकाले विकसित हुँदैन । अपवादलाई छोड्ने हो भने, सामाजिक कुरीति, विसंगति, जातीय भेदभाव र धार्मिक/सांस्कृतिक जटिलताहरूले बेरिएको नेपाली समाजमा एउटा दलित युवा र गैरदलित युवतीबीच विवाह हुने कुरा असम्भवप्राय: नै हुन्छ । त्यही कारण, मोनाको बिहे एउटा सम्पन्न परिवारको युवासित हुन्छ । तर, मोनाको बिहे जुन युवासित हुन्छ, ऊ एड्सद्वारा पीडित व्यक्ति हुन्छ । सहरमा बसोवास गर्ने क्रममा त्यहाँका वेश्यालयहरूमा धाउने चरित्र भएका मोनाको पतिले अन्तत: मोना र उनको पेटमा रहेको शिशुलाई समेत एड्स सारेर मृत्युको सिकार बन्न पुग्छ । पतिको मृत्युपछि मोनाको जीवन कहालीलाग्दो स्थितिबीच गुज्रिन्छ र अन्तत: उसले आफ्ना बाल्यकालदेखिकै साथी चन्द्रेसित नै निकटता बढाउँछे । तर, चन्द्रेसित निकट भए तापनि उनीहरूको गाउँमा बस्ने वातावरण भत्किन्छ । गाउँमा अनेक किसिमका दु:ख, अपमान झेल्नुपरेपछि सहर छिरेका ती तीनै पात्रको दु:खद् अन्त्य हुन्छ । बियोगान्त तरिकाले उपन्यास टुंगिन्छ ।
नेपाली समाजको वास्तविक स्थितिको उत्खनन् गर्ने क्रममा ‘मोना’ले धेरै प्रश्न पनि उठाएको छ । हुन पनि, नारीहरू एकै दृष्टिमा चरित्रहीन बन्न पुग्छन्, यही नै नेपाली समाजको कटु यथार्थ हो । एउटी नारीलाई हरेक किसिमले प्रयोग गरेर उसलाई चरित्रगत हिसाबले समाप्त पार्नका लागि हरसम्भव प्रयास गर्ने गरिन्छ । त्यसको ज्वलन्त दृष्टान्त मोनाजस्तै असंख्य पात्र हुन् । साथै, एउटा पतिको घनघोर भोगवादी प्रवृत्तिका कारण उसका पत्नी र सन्तानले समेत कसरी दु:ख भोग्नुपर्छ र दारुण मृत्युको सिकारसमेत बन्न पुग्नु पर्दछ भन्ने देखाउने क्रममा पनि उपन्यास अग्रसर छ ।
नारीप्रति हिंसा र संवेदनहीनताको विष कतिसम्म फैलिएको छ ? यो पक्ष देखाउन सक्षम उपन्यासमा पारिवारिक अपवादको सम्पूर्ण दोष एउटी नारीको टाउको खन्याएर नेपाली समाजले आफूलाई कतिसम्म क्रूर र अमानवीयताको गोरेटोमा पाइला बढाइरहेको छ भन्ने पनि प्रस्ट पारेको छ । र, उपन्यासमा नारीप्रति समाजको पूर्वाग्रहको खुलासासमेत गरिएको छ । नेपाली समाजको विद्रुप तस्बिर उतार्न अग्रसर ‘मोना’ निम्न वर्गीय नेपाली सामाजिक जीवनको ‘रफ ड्राफ्ट’ प्रतीत हुन्छ । तर, उपन्यासभित्रका पात्रहरू भने ‘फेयर’ जीवन बाँच्ने उत्कट अभिलाषा राख्छन् । तर समाज, समय र परिस्थितिले तिनीहरूलाई ‘रफ’ मा नै बाँच्न बाध्य तुल्याउँछ ।
‘मोना’ केवल स्थुल निर्वाह र सामाजिक स्थितिहरूको बयानमा मात्र बढी केन्द्रित छ । पात्रहरू परिस्थितिसित टक्कर लिन त्यति सक्षम र सबल छैनन् । तथापि, विश्वबन्धुको यो उपन्यासले एउटा के आशा निश्चित रूपमा जगाउँछ भने, भविष्यमा उनीबाट नेपाली साहित्यक्षेत्र र पाठकहरूले अझ धेरै उम्दा उपन्यास पाउनेछन् ।
उपन्यासकार : विश्वबन्धु कार्की
विधा : उपन्यास
प्रकाशक : अन्तर्राष्ट्रिय नेपाली साहित्य समाज, वासिङ्टन डिसी, अमेरिका
पृष्ठ : २०८
मूल्य : २५०।–

साभार:🖋विवश  वस्ती ,ईबुधबार

February 04, 2018

सावधान:निशुल्क वाईफाई चलाउन पाएर मख्ख नपर्नुहोला

अहिले प्रविधिको प्रयोगले मानिसलाई यति सम्म नतमस्तक बनाईदिएको कि आफन्त साथीभाईको घर जादा समेत सन्चो विसन्चो भन्दा पहिला हामी वाईफाईको पासवर्ड सोध्न शुरु गर्छौँ। सबैलाई आफ्नो फोनको इन्टरनेट डाटा कम खर्च गर्न मनपर्छ,अझ नि:शुल्क वाईफाई प्रयोग गर्न पाउदा हामी खुशी महसुस गर्ने गर्छौं।अबदेखि भने निशुल्क वाईफाई चलाउने बानीलाई परिवर्तन गरि हाल्नु होला,किनकि असुरक्षित वाईफाईको प्रयोग तपाईंको लागि खतरा बन्न सक्ने विवरणहरु आइरहेकाछन्।  

अमेरिकामा ५७ प्रतिशत व्यक्तिको व्यक्तिगत विवरणको चोरी सार्वजनिक वाईफाईको प्रयोग गर्दा हुने गरेको तथ्य सार्वजनिक भएकोछ।जब तपाई घर बाहिर वाईफाई प्रयोग गर्दै हुनुहुन्छ,तपाइँको व्यक्तिगत विवरणमाथि वाईफाईको स्वामित्व भएको व्यक्तिले चाहेमा पहुँच पुर्याउन सक्छ भने उक्त व्यक्तिले तपाईंको विवरण गलत उद्देश्यका लागि प्रयोग गर्न पनि सक्दछ। 

तपाईंको सामाजिक संजाल जस्तै, बैंक वा क्रेडिट कार्ड विवरणहरू,फोटोहरू,महत्वपूर्ण जानकारीहरू गलत व्यक्तिको हातमा पर्नु तपाईंको लागि अवश्य खतरापूर्ण हुनेछ।अहिले हामी सबै बढ्दै गएको साइबर अपराध इन्टरनेट हैकिंग बारे जानकार छौ। त्यसैले तपाईंको घर जस्तै घरको वाईफाई पासवर्ड पनि सुरक्षित हुनु अति आवश्यक ,किनकि तपाईंको घरको वाईफाई गलत व्यक्तिको हातमा पर्नु भनेको तपाइँको व्यक्तिगत विवरणहरू माथि बाह्य व्यक्तिको पहुच पुग्नु जस्तै मानिन्छ। वाईफाईको प्रयोगलाई कसरी सुरक्षित बनाउन सकिन्छ ? त्यसको लागि यी सामान्य कुराहरूमा ध्यान पुर्याऔ:

सधैँ सुरक्षित विश्वसनीय वाईफाई प्रयोग गर्ने,
यदि तपाईलाई घर बाहिर हुदा वाईफाई चलाउनै पर्ने परिस्थिति आए पनि उक्त स्थानमा आफ्ना सामाजिक सञ्जाल, बैंक क्रेडिट कार्डको अनलाईनल खाता पहिला लगआउट गरेर मात्र चलाउने
घरको लागि सुरक्षित वाईफाईको पासवर्ड छनौट गर्ने, समय समयमा पासवर्ड परिवर्तन गरी राख्ने
अनलाईन खाताहरूको पासवर्ड पनि समय समयमा परिवर्तन गरि राख्ने
सधै तपाईको घरको  वाईफाई प्रयोग गर्ने उपकरणहरूको तथ्यांक जाँच गर्ने
असुरक्षित वाईफाईको प्रयोग गर्नु भन्दा आफ्नै फोनको डाटा प्रयोग गर्नु बुद्धिमानी हुनेछ

नयाँ वाईफाईको प्रयोग गर्नु पूर्व एक पटक सोच्नुहोस् आफूलाई सुरक्षित राख्नुहोस् अनि अरूलाई पनि कसरी सुरक्षित हुने सुझाव दिनुहोस्। 

January 27, 2018

अमेरिकामा कसरी सुरक्षित हुने?

संसार कै शक्तिशाली देश अमेरिका। हरेक वर्ष हजारौको संख्यामा नेपालीहरु विद्यार्थी भिसामा,आप्रवासी भिसामा, पर्यटक तथा व्यापारिक भिसामा अमेरिका भित्रने गर्छन।अमेरिका आए पछि शुरुवाती दिनहरूमा अधिकांश नेपालीहरुले ग्यास स्टेशन,ग्रोसरी स्टोर,रेस्टुरेन्टहरु बाटै काम शुरू गर्छन र गर्दै आएकाछन।
अमेरिकामा हामी नेपालीहरु कसैसँग झैझगडा गर्न पक्कै आएका होइनौ। हामी आफ्नो र विशेष गरि सन्तानको राम्रो शिक्षा र उज्ज्वल भविष्यको खोजीमा आएका हौ। हामी सबैलाई आफ्नो जीवन र परिवार भन्दा ठूलो आफ्नो काम या व्यवसाय हुन सक्दैन। तपाईको परिवारका लागि तपाई महत्वपूर्ण हुनुहुन्छ,परिवारमा तपाईको साथ जरुरी छ। तपाईको एकछिनको संयमताले तपाईको जीवन बच्दछ। ठूलो दुर्घटना टर्न सक्दछ। 
गत बुधबार जुलाई ४ मा भर्जिनियामा रेशम बजगाईंको ग्यास स्टेसनमा लुटेराको आक्रमण परि र केहि समय  अघि  टेक्सासमा  समिरा सिवाकोटी र मनिष पाण्डेको काम मै हुदा लुटेराको गोली लागेर ज्यान गएको थियो। यस्ता घटनाहरु  घट्नु पक्कै पनि दुःखद  कुरा हुन। यस्ता घटनाहरुबाट पाठ सिक्नै पर्छ, विशेष गरी नव आगन्तुकहरुले। जो अमेरिकामा ४-५ वर्ष भन्दा बढी समय देखि हुनुहुन्छ उहाहरुले यहाँको जीवनलाई धेरथोर बुझी सक्नु भएकोछ। नेपालीहरुले 'कसैसँग झुक्दै नझुक्ने','परि आए पछि नहट्ने'भन्ने जस्ता कुरालाई एकपटक गम्भीर भएर सोच्नु जरुरी छ। यदि कोहीमाथि अन्याय/हिंसा  भएको छ भने कानुनी बाटो रोज्ने आधारहरु पक्कै पनि छन। तपाई माथि कोही आक्रमण गर्न आउछ भने प्रतिरक्षाको लागि तयारी रहनु अवश्य पर्छ नै, तर यो मेरो लेख विशेष गरि दैनिक काममा हुदा,यात्रा गर्दा अमेरिकामा कसरी सुरक्षित हुने भन्ने विषयमा केन्द्रित हो। सम्भावित दुर्घटनाबाट बच्न केके कुरामा ध्यान दिने:
  • आफ्नो काममा/घर भन्दा बाहिर कसैसँग झगडामा नअल्झिने।
  • काममा हुदा कोही लुटन आएको छ भने सर्लक्क हात उठाएर बस्ने,झुक्किएर पनि कुस्ती खेल्नतिर नलाग्ने।
  • बाटो/पार्किंगमा तपाईको गाडीलाई कसैले ठक्कर दियो या तपाईले अरुको गाडीलाई ठक्कर दिनु भयो भने पनि जो सुकैको गल्ती होस भनाभनमा नलाग्ने, तुरुन्त ९११ मा फोन गर्ने।
  • सडकमा कसैसँग पनि सवारी गतिको टकरावमा नअल्झने, तपाईको गाड़ी रोकेर कसैले बाहिर निक्लन भन्यो भने बाहिर नजाने, लुटेरा पनि हुन सक्छ/तपाईलाई आक्रमण पनि गर्न सक्छ,तुरुन्तै प्रहरीलाई फोन गर्ने।
  • सवारी नियम उल्लंघन हुन गई तपाईलाई प्रहरीको गाडीले पछ्याएको छ भने सडकको सुरक्षित छेउमा लगेर गाडी रोक्ने ,प्रहरीसँग बोल्दा नडराउने,स्पस्ट आफ्नो कुरा राख्ने। प्रहरीलाई छलेर भाग्न खोज्नु ठूलो भूल हुनेछ। 
  • पार्क/ट्रेलमा एक्लै नहिड्ने, साँझ या राती जादै नजाने, यदि तपाईलाई कसैले पिछा गरेको शंका लागेमा नजिकैको वस्तितिर जाने,परिवार या साथीभाईलाई आफ्नो अवस्थाबारे जानकारी दिने।
  • यदि तपाईको काममा सेवाग्राही तपाई सँग रिसायो भने भनाभनमा नलाग्ने, तुरन्त म्यानेजरलाई खबर गर्ने, तपाईको कार्यालयले त्यस्ता व्यक्तिलाई आगामी दिनमा त्यो स्थानमा प्रतिबन्ध जारी गर्न सक्छ।
  • भनाभानको  स्थितिमा आफुले कहिल्यै पनि शुरूमा हात छाड्नु हुदैन।
  • आपतकालीन अवश्थाको तयारीको लागि आफु बस्ने शहरको प्रहरी कार्यालयको फोन नम्बर साथमा राख्ने।
  • गाडीमा एक्लै लामो यात्रा नगर्ने, गर्नै परे दिनको समयमा मात्र गर्ने।
  • आफ्नो परिवारलाई सधै आफ्नो काम/यात्राबाट घर फर्कने समय,हुन सक्ने ढिलाई बारे जानकारी गराउने।
'अमेरिकामा कसरी सुरक्षित हुने?' भन्ने विषयलाई विशेष गरि नवआगन्तुकहरुमा अभियान कै रुप दिनु पर्ने कुरा पछिल्ला घटनाहरुले देखाएका छन्। अब एकपटक गहिरिएर सोच्नुहोस र साथीभाईलाई पनि सल्लाह दिनुहोस।काम र पैसा भन्दा जीवन अमूल्य छ ।


January 21, 2018

चर्चित बन्दै निशान भट्टराईको नयाँ गीत 'आफ्नै छायाँ सँगपनि'

नेपाल आईडलको पहिलो सिजनमा धेरैको मन जित्न सफल सुमधुर स्वरका धनि निशान भट्टराईको नयाँ गीत 'आफ्नै छायाँ सँगपनि'को म्यूजिक भिडियो आइतबार युट्यूव मार्फत सार्वजनिक भएकोछ। प्रदिप चापागाँईको शब्द  र आनन्द राईको संगीत रहेको उक्त गीतको संगीत संयोजन गोपाल रसाइलीले गरेका छन। एस स्टडी अस्ट्रेलियाले प्रस्तुत गरको उक्त म्यूजिक भिडियोलाई युवराज वाइवाले निर्देशन गरेका हुन।आकर्षक बनेको भिडियोमा अनिल थापा र जेविका कार्कीको अभिनय रहेको छ। युट्यूवमा राखिएको भिडियोलाई अहिले सम्म पाँच लाख भन्दा बढी पटक हेरिएकोछ। प्रस्तुत छ 'आफ्नै छाया सँगपनि'को युट्यूव मार्फत सार्वजनिक म्यूजिक भिडियो:

January 20, 2018

गजल ‘को होला?’

लुकी लुकी त्यो झ्यालबाट हेर्ने को होला?
मनको आँगनमा प्रेमको फूल छर्ने को होला?

शरीर थर्थरी काप्ने गर्छ विहानीको सिरेटोमा
अन्जानलाई न्यानो अँगालोमा बेर्ने को होला?

हिडीरहेछु वर्षौ देखि उही एक्लो यात्रामा 
मलाई देखी लजाउदै बाटो फेर्ने को होला?

लेख्ने आँट गरेन कसैले हृदयको भित्तामा
मुटुको कुनामा आफ्नो नाम केर्ने को होला?

यो जीवनमा सुन्दर रंगहरू भर्ने को होला?
लुकी लुकी त्यो झ्यालबाट हेर्ने को होला?

-विश्वबन्धु कार्की, हाल:अमेरिका 

January 15, 2018

गजल ‘थाहै भएन’

जिन्दगी कति चाडो ढल्किएछ थाहै भएन
मनमा प्रेमको आगो सल्किएछ थाहै भएन।

तिरमिर तिरमिर देख्दैछु त्यो परको क्षितिज 
आँखामा तिम्रो तस्विर टल्किएछ थाहै भएन।

बगैंचामा गुनगुन बढ्दै गएकोछ हिजोआज
ती फूलहरूमा भमरा पल्किएछ थाहै भएन।

बिर्सन धेरै कोशिशहरू गरि नै रहे रातभर
फेरि पुराना यादहरू झुल्किएछ थाहै भएन।

सम्झनाका छाल छचल्किएछ थाहै भएन
जिन्दगी कति चाडो ढल्किएछ थाहै भएन।

-विश्वबन्धु कार्की, हाल:अमेरिका 

January 14, 2018

गजल ‘गन्तव्य’

सधै खट्किरहन्छ मनमा एउटै कुरा
गन्तव्य टाढा कहिले होला पुरा?

आजकल मुटु दुखेको दुख्यै मेरो
एक हातले गुलाब दियौ अर्कोले छुरा।

झुपडीको छानो नटालेको वर्षौ भाछ 
कहाँ पाउँ हीराका हार सुनका चुरा?

दु:खको पहाड झनझन अग्लो बन्दैछ 
आफ्नै खुशीहरू भने बन्दै गए भुरा।

उमेरसँगै हातगोडाहरू हुदै गए लुरा
गन्तव्य टाढा कहिले होला पुरा?
-विश्वबन्धु कार्की, हाल:अमेरिका 

Featured Post (चित्रित पोस्ट)

BishwaArt