गजल

जल्नेहरूलाई छुट छ
कमिला एक जुट छ।

निगम बाड्दैछ बोनस
जहातही ब्रह्मलुट छ।

छिमेकी सन्की मेरो
भाई भाईमा फुट छ।

दक्षिणको भएन ठेगान
उत्तरमा पहिरो रूट छ।

गजल

बादलले छपक्कै ढाक्यो पानी पर्न देउ
मायाको त्यो ईन्द्रेणी मन मै झर्न देउ।

भोली देखि पिउने छैन कसमै खान्छु
अन्तिम पटक हो यो गिलास भर्न देउ।

झोल भरिएको बोतल कहिल्यै लडेन
शरीरभित्र सिसामा बग्दो नसा सर्न देउ।

धेरै दिनदेखि शान्त थियो मनको तलाउ
आज म भित्र बढिरहेको तुफान टर्न देउ।

गजल

सम्झेरै रात कट्दैछ आजकल
मनमा आशा अट्दैछ आजकल।

संसार टाढिदैछ झन् पर पर
दुरी हाम्रो घट्दैछ आजकल।

उपहार किन्नेको हुल बजारमा
फूल र नोट सट्दैछ आजकल।

यादले पछ्याइ रह्ये बाटोभरि
मुटुको व्यथा हट्दैछ आजकल।